BAHAN KHOTBA KKR/PENYEGARAN ROHANI GIDI KLASIS KAMBO BULAN NOVEMBER 2022

Thema: “Ogobak Kigirirak Wone”

Kejadian 1:27

Oleh: Pdt Ombius Yikwa (Wakil Klasis Kambo)

I. Pendahuluan

Ninogoba Allah Iniki kombunuk At ebe entenggen ndak-ndak Adam, Kawa imbirak ogobak kigirogo piaregerak. Awi yarak arum logonet yabu erit nogologowak nduk unde epiaregerak ti ndak-ndak nit Ar apuri yabu erit nogologowak nduk ninalitik-ninalitak unde epinanegerak. Epinanege nagatik yabu ekwi nigak Allah nen napuri yabu unde epiyagirak ndak-ndak ekwi iyamun ili lek a yinuk ninggi-nanggi Enegen woninake menggerak. Nit Ar amendek aret ogorik o. Kej. 1:27;2:15; Ef. 2:10; 1Kor 4:2.

Ti kenok nowe naot o

At Ninogoba Allah Nen ninabuwa mbanuk nggok togon epinanege menggerak me, Allah ake warogo pogo mengga kwak kit nen ninenik logonet Allah ake mban erit nogo logowok nduk kenebe apit aret Allah ake lenogo pogo o, yinuk ninebe apit aret Allah wogonuk logowak lak mbake logonet yokirage agarik o, ti erimunggutak paga Allah nen yi aber aret nalur enakwe kigi yinuk alenggen kinombake logogen.Roma 12:1.

II. Inaruk Konembunuk Lirogon Ekwi Inok Alenggen Inoba Piorak Ulangan 28:1-14

Yorage nagagirik ambe inom yorage logonet kit nen aliku kinogoba Allah li rogon aret konenggi, yogop eno ndogop eno An yogondak yokirage yi li rogon waganggo logomunggutik erit nogwe ekwi kinok Aliku kinogoba Allah nenyiakumi ndiakumi o nggwen paga yime wonogwe nogo abok aret igak kit kinalik mban tiapinagagin o. 

Kit nen aliku kinogoba Allah one yokirage lirogon aret konembunuk ekwi kinok At alenggen kinoba pinagage logonet obelom epinagarak nogo ebe yi o:

1. Kinawi kota paga wonogwe kigak inom.

2. Kineyabu yarak me wonogwe kigak inom.

3. Kinakuwi elege ndaganakwe menggam inom obelom erogo pinagage.

4. Yiawi-ndiawi yarumunggutak inom.

5. Kinanggumi ndaruwaknduk onom obelom erogo pinagage.

6. Anggen mbanak yonggokak kinayum obelom erogo pinagage.

7. Mbi worako menggam un awina obelom erogo pinagage.

8. Wundi nogwe-unggwi wogwe ekwi kigak alenggen kinoba pinagage.

9. Kinawim nen kinorirak nduk erimunggarak kwe kinegen kigak kinogo Allah nen tebenogo pinagagin.

10. Kianggwen wokiragagem nogo me wonogwe kigak alenggen kinoba piagage logogin.

11. Ti erogo pinagage kenok yi akumi-ndi akumi o nggwen paga yime menggarak abok aret nen yi Allah apuri aret yigo o yinuk akumi inagabiti mbako logogun o.

12. Yi awi-ndi awi yarumunggutak anggen piruwak nduk aliku Allah nen ona ngginik kagak mbogut paga tu parogo wupuwage erimenggerak paga kinamendek ambik arigin.

13. Akumi nggino yoramunggup lek o.

14. Nggino yokirawogwe inok pera wogorogo logomunggup o.

15. Mbogot paga tu parogo ngginu-ngginu erogo upinani woramenggerak paga niname yagabit age kenok egu ngga patuwi o yinuk yurak eninabigin. Maleaki 3:10.

16. Akumi iniki alenggen paga kuwak ekwi inok Allah iniki kunik aganake menggerak me, kit kuwak ekwe logonet kiniki aninggin kagak kuwak ekologogup. Kinebi kagak kuwak ekwi ekologogup ata kinalitik-kinalitak kniki kombunuk kianlenggen paga kuwak ekwe logonip o. 2 korintus 9:6-7.

III. Inaruk Konembunuk Ekalek Inok Pulunogo Piorak Wone  Ulangan 28:15

1. Kinawi kota paga wonogwe kigak inom.

2. Kineyabu yarak me wonogwe kigak inom pulunogo pinagage.

3. Anggen mbanak yonggokwak kinayum inom.

4. Mbi worako menggam kinawun awian inom pulunogo pinagage.

5. Kinanggumi endaganako menggam inom.

6. Kinakuwi enege ndaganako menggam inom.

7. Undinogwe-undiwogwe ekwi kigak inom pulunogo pinagage.

8. Aliku kinogoba Allah mbo punuk maluk ekwi kinok, akumi nen pulunogo pinagagwi, nalok-kalok erogo pinagagwi, yimendek-ndimendek ekwi nogo abe eya mbanggwi lek, we tigone-tagone erumonggop nduk erogo pinagagwi.

9. Kit kinawi unde anuk logowan nogome nogome wonogwe me Aliku kinogoba Allah nen andi-pandi epinagage epinagi woramenggerak paga kambit nogwe kigak kinam3e nggwen tipaga akumi lek aret logogun.

10. Kinamendek yarak paga kannenet pege, un kunogo pege eke kagak kinebe lek ogologomunggup.

11. Yabu nggok Lombok waganogo yarumunggutak kwe we anom warogo yako logogun, hasil ambe ninenggim arigin lek. Imamat 26:16.

12. Kumuli kunogo pige, inegen mbuk erogo pige, iniki Kobak erogo piga, iniki apit erogo pige.

IV. Kesimpulan 

Apa ambe endage Ananias  akwe Tabira imbirak Allah nen  tati logowak nduk piaregerak, nggwen onggo kunggalek kagak ti it pake aret wonogogarak me, uang egu apit nubakpakugarak ando mbuluk mban Peterut enggime puwogogarak “akar dosa Ananias dan Sapira adalah cinta mereka akan uang” apa uang wonok wogogarak nogo mban tiapiarugwarak, nggwen tati nit mendek mbakugwarak eti paga Allah enegen mari ekugwarak, Aallah ambokam laganggugwarak, Abereniki ambukam laganggugwarak. 

Yabu nggok waganogo yakendak kwe ake pipak pulek. An neyabu, an nanggonen mbakerak ti paga ake mbuluk pegerak. Uang ti an nanggonen paga kunik mbakerak paga egu apit lombok nubak pakerak, mbuluk mban Peterut enggime puwagarak. 

Wam keluarga angger wokegarak nomar onggo wogoragandak kwe Allah nen wondegerak kwak mbarilek me ake perpuluhan ekwe lek me Ananias akwe Sapira imbirak kutuk alom waganggugwarak nogo ndak-ndak nit kolorak nduk ekwe “uang adalah akan dosa” . 1 Tim 6:10. Allah Ambokam Laganggulik Kagak laganggwi kinok kit aret kinambokam laganggologwe me lipakologonip o. Galatia 6:7.